一年一度嘅 Clockenflap,各位 flappers flirt 成點?為免「Flirt 到痕時方冇橋」!提供八大金句俾開不了口嘅獨毒,嘗試開放個心又不失真我咁識朋友/溝仔溝女 (怕咩認啫我唔會 shame 你架喎)。搭訕嚟講族長有一大原則,我唔鼓勵族人為咗討好對方而扮嘢,例如明明唔識隊 band 扮識,甩 beat 打拍子更係超柒!寧願帶傻更更嘅你進入我嘅音樂世界,都唔想被啲 #冇料扮四條 嘅陌生男迫埋嚟 un un un 以為自己好型。

Pink Dom HK 手工愛之啤酒

1. 可唔可以幫我拎住杯啤酒?🚾🍺

去音樂節排流動廁所 #是常識吧,所謂「條條大隊通茅廁」,全部都臭架喇,識排梗係排喺型女美男後面啦。電話冇電問對方幾點,再問之後有冇趕住去睇邊隊,對話好自然就開始。屙尿前麻煩佢幫你拎住杯啤酒 (呢樣都幾難拒絕),如果一直傾落唔鍺,屙完可以 surprise 送埋俾佢飲,對方唔好意思/唔趕時間就提議佢陪你 (又排) 買過第杯,真係從未排隊排得咁開心呀。

汗水中遇到知音之興奮

2. (望住佢心口) OMG 我都好鍾意呢隊 band!🎧

每個人都有唔同心態/agenda 去 music festival,族長嚟講談音樂是基本的,其他嘢只係 bonus 亦唔抗拒,所以以音樂打開話題還是最舒服,唔令人覺得你係漁翁濫撒網。試著說「我都有睇 (對方著住件band tee) 嗰場 tour!」(當然你真係要識喂!),若果冇機會睇 live 就叫佢分享吓,冇人會拒絕講自己熱愛嘅事,族長亦覺得呢個狀態嘅人是最吸引的。

鍾意咗幾耐呀,邊隻碟邊首歌邊個 remix 最正,笑吓成員啲台風,有冇玩音樂,會重拾鼓棍嗎之類。就算口味唔同,亦係互相揶揄/教育對方嘅好機會:少年,你太無知了,我真係要借隻乜乜乜你聽吓,真係超經典。跟手就抄埋個牌喇。

我企這裡,你企過嗎?

3. 好想聽佢哋玩《__》嘅live… 🎸🎹

呢句好笑 but so true:Nothing brings people together faster than complaining. 拿族長咁睇嘅,一味呻「宜家大不如前,還是舊歌好」就未免太負能量又煩厭嘅 (咁唔鍾意咪唔好睇囉),但總有幾首經典大家都會好想聽一齊un一齊舉手大合唱。唱完幾首新歌,趁回氣時搭訕打開呢啲話題,可以知道對方嘅 side track 心水,或者唔鍾意但唔敢認嘅 band,所謂 #場很大床很大,茫茫人海遇到志趣相投嘅人,平時隔住個 spotify 邊有機會?Tinder 都 filter 唔到咁準啦!

碌草地是常識吧

4. 我 pat pat 後面有冇污糟呀?⛺🍑

除咗音樂,呢啲場合亦有好多獨特嘅氣氛俾大家放膽搭訕,例如坐喺草地睇表演,起身時借啲咦叫隔離個可愛男生 check 吓你 pat pat,其實係擺明車馬叫對方 check your ass,睇情況可以挑逗落去。叫高過你嘅人 check 吓頭髮有冇嘢又得,夜深時再大膽啲熟啲時 check 吓對眼對唇有冇甩都得,豐儉由人啦。

香蕉與香煙,睇 outdoor festival 必備提神之寶

5. 你只要為我點一點火 🚬/ Tequila 一杯 烈酒的魔力 使我會被支配 🍹

#借火 大家都識,搵人幫手 #捲煙 都係一種做法,音樂節亦有好多 social smoker,即係 #戒買唔戒食 嗰班粉腸 😂,一到夜深飲多兩杯就R煙食,自問夠大方嘅就帶多幾包啦。黑暗中癮起,摷摷吓有人主動遞埋嚟請你食/點火係 sweet 嘅。溫馨提示,唔好咁 cheap 視心儀對象啲朋友為無物,大方啲請埋冇死嘅,咪當識多個朋友囉。

除咗直接請飲酒,自家釀梅酒/溝 cocktail 真係冇得輸,大好藉口請靚仔 have a sip of your… JUICE 😏。

6. 你條 headband/你個紋身好靚👒👓

Headband 呀帽呀袋呀係最方便嘅 accessories,造型即時 upgrade,戴得都想人欣賞吧。族長嘅怪癖,係 judge a person by his shoes。欣賞對方嘅衣著打扮去開始對話,換嚟嘅可能係一間小店/一次旅行/一次遺憾嘅小故事。不論 henna 定紋身,show 得出嚟都預咗俾人問有咩意思,進階啲問對方下一個想紋咩,挑逗啲問佢想唔想睇自己嗰個… the tattoo you can’t see now and it depends on how lucky you are 😏。

越黑越醉越大膽

 

7. 人群中電死你 👀⚡

唔止音樂節, 人多擠逼嘅地方都好適合玩「萬囡叢中一鳳眼」。話說族長以前見到心儀男仔望自己時,都係會迴避嘅怕醜寶寶。但自從成為咗 #女主人,最近都有練習 #不要離我太遠,不要迴避眼神。千祈唔好為咗咩矜持而錯過機會,這是自信心的絕佳練習,唔駛多,對望報以微笑就可以了,仲係怕羞嘅就等對方主動吧。所謂「 Band show 過後冇仔嗒」,機會是由妳自主的。

8. 完場架啦!NOW OR NEVER!👥💭

十一年,發展到有三日嘅 Clockenflap,一年一度識到本地 indie 聽眾加國際音樂人嘅機會,你唔係毒來毒往呀嘛?星期六完場前,你都有機會約企喺你隔離嗰個人聽日見 (睇手帶呀喂),每晚完 show 亦係大家心情最澎湃嘅時候,可以問吓對方聽日嘅路線圖 (多數都十五十六),可以約定分頭排廁所買啤酒之類。放鬆心情啦,唔係事必要調到開花結果,當多個 buddy 都迫得安全啲嘛。尾場又可以問吓人去唔去 after party,把握最後機會!

 

😎 族長有話兒 🎶

以上貼士唔單止可以用喺音樂節度,#啤酒節 又得,#嘉年華 都得,最緊要大家願意放開心情去擴闊自己嘅世界,你永遠唔知前面有咩 surprise 等緊你。最後溫馨提示,記得要睇人眉頭眼額,慢慢測試對方嘅步伐,唔好嚇親人,若果對方冇性趣見好就收,亦唔需要 feel bad about yourself,損失嘅係佢冇咗可以認識你嘅機會,又或者嗰刻對方真係冇心情講嘢,輕鬆啲!族長約定你 Clockenflap 見!😎🙌

資料來源:goo.gl/tx5HPm
#goodmoaning #調情 #搭訕 #挑逗 #撒嬌  #溝仔 #溝女 #性愛英語 #情慾短訊 #性暗示 #性幻想 #性邀請 #音樂節 #族長出沒注意 #pickupline #flirting #teasing #dirtytalk #filthymind #foreverdirtymind #clockenflap #clockenflap2018

你不需付出任何金錢,按 5 次拍手就能支持小族長大棒棒基金。如登記 LikeCoin ID 再拍手,基金收入將會更豐厚。